Firaminista Italiya ya nemi a mutunta hukuncin da kotu ta yankewa Berlusconi

Firaministan Kasar Italiya, Enrico Letta ya ce yakamata a mutunta hukuncin da kotu ta yankewa tsohon Firaminista Silvio Berlusconi, yayin da ake shirin kada kuri’a game da gwmnatinshi amincewa a yau.

Firaministan kasar Italiya, Enrico Letta REUTERS/Remo Casilli

“A mulki irin na demokradiyya, ya kamata a zartar da kowane irin hukunci.” Inji Letta a lokacin da yake ganawa da ‘yan majalisar dattawan kasar.

Kuma bisa ga dukkan alamu wasu daga cikin ‘Yan Jam’iyar Silvio Berlusconi, za su bijire masa wajen goyan bayan gwamnatin kasar a kuri’ar amincewa da gwamnati da ake sa ran kadawa a yau, bayan ficewar wasu ‘Yan Majalisu daga gwamnatin hadin kai.

Angelino Alfano, mataimakin Berlusconi kuma Sakataren Jam’iyarsu, ya bukaci ‘Yan Majalisun Jam’iyar su da su goyi bayan Firaminista Enrico Letta.