Zaman makoki bayan mutuwar daruruwan mutane a Turkiyya

Firaministan Turkiyya Racep Tayyep Erdogon ya tabbatar da mutuwar mutane 232 a hatsarin da ya faru a wata mahakar ma’adinai da ke kusa da birnin Soma na lardin Manisa a kasar Turkiyya.

Aikin ceto bayan faruwar hadari a mahakar ma'adinan Turkiyya REUTERS/ Osman Orsal

Erdogon, wanda ya kai ziyarar gani da ido bayan faruwa hadarin, ya ce yanzu haka akwai wasu daruruwan ma’aikata da ake zaton cewa suna ci gaba da kasancewa a karkashin kasa bayan ruftawar ma’adinin da suke aiki a ciki.

Rahotanni sun ce mafi yawa daga cikin wadanda suka rasa rayukansu a wannan hatsari sun mutu ne saboda shakar gurbatacciyar iska mai guba a cikin rami, yayin da rahotanni ke cewa sai da jami’an tsaro suka yi amfani da hayaki mai sa kwalla domin tarzatsa mutanen da ke zanga-zanga a birnin Ankara domin nuna bacin ransu dangane da wannan hatsari.

Tuni dai gwamnatin kasar ta ware kwanaki uku domin zaman makoki.