Turkiya ta yadda a gina sabuwar Coci a Istanbul

Gwamnatin Kasar Turkiya ta amince a gina Coci a karon farko a cikin kasar tun faduwar daular Ottoman a 1923, kamar yadda wata majiya daga fadar gwamnatin kasar ta tabbatarwa Kamfanin dillacin Labaran Faransa.

Wannan ne karon farko da za a samu ginin Coci tun kafa Jamhuriya a kasar Turkiya.

Mabiya addinin Kirista a Turkiya ne masu magana da harshen Syria za su gina Cocin a birnin Istanbul.

Akwai dai tsoffin Coci a Turkiya amma tun faduwar daular Ottoman babu wata sabuwar Coci da aka gina a cikin kasar mai yawan al’ummar Musulmi.

Wannan matakin kuma ya yi karo ga masu sukar gwamnatin Jam’iyyar AKP mai kishin addinin Islama.