'Yan ta'adda sun kashe sojojin Nijar 23 a harin kwantan bauna

Karon farko tun bayan juyin mulkin Nijar a watan Yulin bara, gwamnatin Sojin kasar ta sanar da mutuwar dakarunta 23 a wani hari da ‘yan ta’adda suka kai musu a lokacin da suke tsaka da aiki a gab da iyakar kasar da makwabtanta Mali da Burkina Faso.

Wasu sojojin Nijar. AFP - ISSOUF SANOGO

A wata sanarwa da ba safai sojojin na Nijar suka saba fitar da makamanciyarta ba, ta ruwaito ma’aikatar tsaron kasar a jiya Alhamis na tabbatar da mutuwar sojojin 23 kan iyakar kasashen 3 a hare-haren ‘yan ta’addan na ranakun Talata da Laraba.

Duk da yadda Sojoji suka kwace mulkin kasar ta yankin Sahel a watan Yulin da ya gabata, hare-haren ‘yan ta’addan da kasar ke gani tsawon shekaru 8 daga kungiyoyi masu ikirarin jihadi na ci gaba da tsananta, duk da cewa Sojojin da ke mulki basu fiya bayyanawa ba face a wannan karon.

A cewar sanarwar ‘yan ta’addan su fiye da 100 sun yiwa Sojin na Nijar kwantan bauna ne a tsakar daji wanda ya kai ga musayar wuta tsakanin bangarorin biyu, kuma suma dakarun Sojin sun yi nasarar kashe ‘yan ta’adda akalla 30.

Sanarwar ta ce lamarin ya faru ne a tsakanin yankin Teguey da Bankilare inda ‘yan ta’addan suka dasa bama-baman gargajiya da kuma wasu motoci da suka ajje a hanya bama ɗana musu bam, lamarin da ya kai ga kisan Sojojin na Nijar 23 da kuma jikkata wasu 17.