Kylian Mbappe ya amince ya koma Real Madrid a karshen wannan kaka

Dan wasan gaba na Paris St-Germain, Kylian Mbappe ya amince ya koma kungiyar kwallon kafa ta Real Madrid a karshen wannan kaka da muke ciki.

Dan wasan gaba na Paris Saint-Germain striker Kylian Mbappé. AP - Aurelien Morissard

Tun da farko kyaftin din na tawagar kwallon kafar Faransa mai shekaru 25 ya shaida wa kungiyarsa cewa yana so su yi hannun riga da zarar kwantiraginsa ya kawo karshe a watan Yuni.

Mbappe bai kai ga sanya hannu a wata yarjejeniya da Real Madrid ba, amma za a sanar da cimma yarjejeniya da zarar an tabbatar da cewa kungiyoyin biyu ba za su kara da juna a gasar zakarun Turai na wannan kaka ba.

Dan wasan, wanda ya taba lashe kofin duniya, shine wanda ya fi kowa ci kwalllo a tarihin kungiyar ta PSG, inda yake da kwallaye 244.

Mbappe ya kudiri aniyar a warware batun makomarsa kafin watan Maris din nan, hakan ne ma ya sa a ranar 13 ga watan Fabrairu, jim kadan kafin atisaye ya tuntubi mai kungiyar PSG, Nasser Al-Khelaifi, kana ya shaida masa cewa zai bar kungiyar ya koma Real Madrid.

Kuma idan dan wasan tsakiya na kasar da Madrid, Luka Modric ya bar kungiyar a karshen wannan kaka, Mbappe ne zai gaji lamba 10 daga wajensa.