Crystal Palace ta nada tsohon kocin Frankfurt a matsayin sabon kocinta

Kungiyar kwallon kafa ta Crystal Palace da ke wasa a gasar Firmiya Ingila ta nada tsohon kocin Eintracht Frankfurt ta kasar Jamus, Oliver Glasner a matsayin sabon kocinta.

Sabon kocin Palace Oliver Glasner. © afp

Dan kasar Austria din mai shekaru 49 ya maye gurbin Roy Hodgson, wanda ya yi murabus a jiya Litinin don bai wa kungiyar damar ci gaba da shirinta na nada sabon mai horarwa a karshen wannan kaka.

Palace tana matsayi na 15 a teburin gasar Firimiya a yanzu haka, bayan da ta yi rashin nasara a wasanni 10 daga cikin 17 da ta buga a baya-bayan nan.

Glasner ya kulla yarjejeniyar zama a Palace har zuwa watan Yunin shekarar 2026, kuma shine zai jagoranci wasan da za ta buga da Burnley a gida a ranar Asabar mai zuwa.

Mataimakan Hodgson, Ray Lewington da Paddy McCarthy ne suka jagoranci wasan da Palace ta yi kunnen doki 1 da 1 a gidan Everton a daren Litinin, a yayin da Glasner, wanda bai kai ga nada mataimaka ba ya kalli wasan.