Masar ta tsallaka kwata final bayan doke Ivory Coast a gasar cin kofin Afrika

Masar ta fitar da Ivory Coast daga gasar cin kofin Afrika bayan doke ta a bugun fenariti da kwallaye 5 da 4 bayan da suka kammala mintuna 90 na wasan ba tare da kwallo ba haka zalika karin mintuna 30 da aka yi musu daga bisani.

Masar ta tsallaka wannan mataki ne bayan safe mintuna 120 ta na doka wasa da Ivory Coast ba tare da iya zura kwallo ba. CHARLY TRIBALLEAU AFP

Mohammed Salah kaftin din tawagar ta Pharaohs ya zura kwallon karshe da ta bai wa kasar tasa nasara wadda ke da tarihin dage kofin gasar har sau 7 matsayin mafi dage kofin a nahiyar.

Yanzu haka dai Masar za ta hadu da Morocco ne a wasan kwata final ranar lahadi a filin wasa na birnin Yaounde.

Wasan na jiya dai ya zowa Bailly mai tsaron baya na Manchester United a wani yanayi duk da irin gagarumar gudunmawar da ya bayar a wasan don ganin kasarsa Ivory Coast ta yi nasara amma kuma shi ne dan wasa daya daya gaza zura kwallo a bugun fenaritin.

Ivory Coast din dai ita ta fitar da Algeria mai rike da kambun gasar bayan lallasa ta a wasansu na karshe matakin rukuni.

Yayin wasan na jiya dan wasan Masar Mohamed El Shenawy ya samu rauni a kafa wanda ke nuna babu tabbacin ya iya kasancewa cikin tawagar da za ta kara da Morocco a karshen mako.