PSG ta fitar da Barcelona daga gasar zakarun Turai

Kungiyar kwallon kafa ta Paris Saint German ta fitar da Barcelona daga gasar Zakarun Turai, bayan lallasa ta a gida da ci 4 da 1 yayin wasan kwata final a daren ranar Talata.

Mai horas da kungiyar Kwallon kafa ta Barcelona REUTERS - Sarah Meyssonnier

A wasan farko dai Barcelona ce ta je gidan PSG inda ta yi nasarar zura mata kwallo 3 yayin da ita kuma PSG ta ci 2, inda jimillar kwallayen na wasanni biyu da suka buga gida da waje 6 da 4 kenan.

Dama gabanin wasansu na zagayen kwata final din na daren Talata ɗan wasan PSG Kylian Mbappe, ya aika sakon gargadi ga kungiyar Barcelona.

'Yan wasan PSG na murnar chasa Barcelona a Kwat Fainal REUTERS - Juan Medina

Tarihi ya nuna Mbappe ya taɓa cin Barcelona ƙwallaye uku a wasa guda a gasar ta Zakarun Turai, a shekarar 2021 inda PSG ta doke Barcelona da ci 4 da 1 a haduwar farko ta wasansu da aka buga a birnin Paris.

A wasan na jiya ma tarihi ya kusa maimaita kansa inda Mbappe ya zura ƙwallaye biyu rigis a ragar Barcelona.

Klyan Mbappe yana murna bayan cin kwallo REUTERS - Juan Medina

A wani wasan na kwata final ɗin da aka fafata a daren na ranar Talata, ƙungiyar Atletico Madrid ta yi adabo da gasar ta bana bayan da Borussia Dortmund ta lallasa ta da ƙwallaye 4 da 2.

A baya dai Atletico Marid ta caskala Dortmund da ci 2 da 1 a wasan farko da suka buga.

Yanzu haka Dortmund za ta fafata wasa da PSG a wasan kusa da na karshe.