Kotu a Faransa ta aika Sammacin kama mutane 3 kan harin Rosiers

A cikin watan fabrairun da ya gabata ne, Kotu a kasar Faransa, ta gabatar da sammacin kasa-da-kasa domin kama wasu mutane 3 da ake zargi da kai harin ta’addanci a Unguwar Rosiers, ta yahudawa a birnin Paris a 1982

Harin da ya yi sanadiyyar mutuwar mutane 6, kamar yadda majiyar Shara’a a kasar ta Faransa ta sanar bayan share tsawon shekaru 32 da faruwar lamarin.

Mutanen 3 da ake zargi na rayuwa ne a halin yanzu a gabar yamma kogin Jodan da kuma Kasar Norway, an kuma gano su ne a karkashin binciken da Alkali da ke kula da laifukan ta’addanci na birnin Faris Marc Trévidic ke gudanarwa.

A ranar 9 ga watan Agustan 1982 aka jefa makamin Gurneti a wani shagon shan Shayi da ke Unguwar Yahudawa ta Rosiers a birnin Paris, inda ya fashe a tsakkiyar taron jama’a sama da 50, kafin daga bisani mahara 2 su kutsa kai a shagon suka kuma buda wuta a kan jama’a.

Majiyar binciken ta ce mahara 3 zuwa 5 ne suka kai hare-haren, wadanda bayan aikata ta’asar, suka sulale tare da watsar da harsasan Bindigoginsu, kirar kasar Polongne a gefan hanya

Harin da aka kai a cikin minitana 3 ya yi sanadiyar mutuwar mutane 6 a yayinda wasu 22 suka jikkata,

tun a wacan lokaci ne dai aka zargi wani gungun palestinawa karkashin hukumar cin gashin kan palestinawa ta PLO, da kuma kungiyar Fata ta Abu Nidal wanda ya rasa ransa a 2002 a wani yanayi dake ci gaba da kasancewa a duhu har zuwa yau

Shekaru 32 da faruwar lamarin yau bincike yace ya gano mutanen 3 daga cikin wadanda suka kai harin a karkashin Abu Nidal, sakamakon shaidun da wasu boyayin mutane suka bayar, ga masu binciken da babban ofishin tsaron cikin gidan kasar faransa ke yi kan wannan dadden al’amari