Jiragen yaki sun yi lugudan wuta a yankunan ‘Yan tawayen Syria

Rahotanni daga Syria na nuna cewa, Jiragen yaki na ta lugudan wuta a yankunan ‘Yan tawayen Syria, a yayin da aka nemi kasar Sin ta tallafa wajen kawo karshen tashin hankalin, wanda yayi sanadiyar mutuwar mutane 180 a jiya. A cewar rahotanni, akalla hare –hare guda biyar a garin Damascus inda aka kashe fararen hula 30 cikinsu harda yara guda biyar.  

Hayaki ya turnuke wani yankin kasar Syria REUTERS/STRINGER

Kungiyar nan mai saka ido akan rikicin na Syria ta ce wadanda akan kashe suna cikin mutane 182 da aka kashe a jiya Talata.

Sabon fada dai ya barke a yau Laraba, a yayin da ‘Yan tawayen suka kai hari kan dakarun da wajen binciken ababan hawa a Maaret al – Numan.

Wakilin Majalisar Dinkin Duniya da kasashen larabawa na musamman, Lakhdar Brahimi, ya yi kira ga kasar Sin da ta taimaka wajen ganin an kawo karshen wannan rikici.