Arteta yace Arsenal zata farfado

Dan wasan Arsenal Mikel Arteta ya nemi afuwar magoya bayansu akan dukan da Chelsea ta yi masu ci 6-0 a premier league inda Arsene Wenger bai sha da dadi ba wanda a karawar ce a ranar Assabar ya yi haskawa karo na 1,000 a matsayin kocin Arsenal.

Dan wasan Arsenal Mikel Arteta

Kashin da Arsenal ta sha a Stamford Bridge shi ne karo na uku da ake lallasa kungiyar a bana bayan ta sha kashi ci 5-1 a hannun Liverpool tare da shan kashi ci 6-3 a hannun Manchester City.

Cikin minti 17 Chelsea ta jefa kwallaye uku a ragar Arsenal, amma rudanin da alkalin wasa ya haifar a wasan shi ne ya ja hankalin mutane a Stamford Bridge.

Alkalin wasa Andre Marriner ya ba Kieran Gibbs jan kati ne maimakon Alex Oxlade-Chamberlain dan wasan da ya tare kwallo da hannu a ragar Arsenal.

Arteta ya sha alwashin zasu wartsake duk da kashin da suka sha a hannun Chelsea.