Yemen za ta janye jami'an diflomasiyya daga kasar Iran

Gwamnatin kasar Yemen da ke gudun hijira ta bayyana aniyar janye jami’an jakadancinta daga Iran, saboda abinda ta bayyana a matsayin shishshigin da hukumomin birnin Tehran ke yi a harkokin kasar.

Shugaban Yemen, Abd Rabbo Mansour Hadi REUTERS/Khaled Abdullah

Wata sanarwar da fadar shugaba Abedrabbo Mansour Hadi ta fitar, ta zargin Iran da marawa mayakan Huthi baya, a yakin da suke yi da gwamnatin kasar ta Yemen mai samun goyon bayan kasashen Larawaba.

A karshen watan Maris Shugaba Hadi ya tsere zuwa birnin Riyadh na kasar Saudiyya lokacin da mayakan na Huthi suka nufi inda ya fake a birnin in Aden.