Harin gurneti ya kashe Mutane 20 a Bangui

Akalla mutane 20 ne suka rasa rayukansu a Bangui, babban birnin Jamhuriyar Tsakiyar Afrika, bayan da wasu mahara suka wurga gurneti a wajen wani taron zaman makoki. Ministan tsaron kasar, Denis Wangao Kizimale, yace harin ya raunata wasu mutane goma sha daya, wadanda a yanzu haka suke karbar magani a asibiti.

Dakarun Sojin Faransa da na Afrika da ke aikin wanzar da zaman lafiya a kasar Jamhuriyyar tsakiyar Afrika REUTERS/Luc Gnago

Tun a watan Maris din bara, kasar Jamhuriyyar Afrika ta tsakiya rikici ya barke a kasar mai nasaba da addini tsakanin Musulmi da Kirista.

Gwamnatin kasar tace ‘Yan ta’adda ne suka kai harin, amma babu wata kungiya da ta fito ta dauki alhakin kai harin.

Rikicin kasar dai ya kazance, a lokacin da mayakan anti-balaka kiristoci suka fara kai hare haren fansa kan musulmi bayan mayakan Seleka musulmi sun hambarar da gwamnatin Francois Bozize.