Domenech ya rubuta Kamus din rayuwarsa a Tamola

Tsohon kocin Faransa Raymond Domenech ya caccaki kocin Chelsea Jose Mourinho da wasu ‘Yan wasan Faransa da ya horar, Franck Ribery da Nicolas Anelka a cikin wani sabon littafinsa da za’a kaddamar a gobe Laraba.

Raymond Domenech Tsohon Kocin Faransa GettyImages

Littafin wanda Tsohon kocin na Faransa ya kira kamus din rayuwarsa a duniyar Tamola, ya caccaki Mourinho game da taken da ake masa “Translator” Mai fassara.

Haka kuma Raymound yace Anelka shi ne tushen samun baraka a tawagar ‘yan wasan Faransa na rashin nuna da’a musamman a gasar cin kofin duniya da aka gudanar a kasar Afrika ta kudu.

A cikin Littafin na Domenech ya danganta Henry da Zidane amma yace duk da Henry ya taimakawa Faransa zuwa gasar cin kofin Duniya a 2006 amma darajarsa ta zube a lokacin da ya yi amfani da hannu a karawa tsakanin Faransa da Ireland.