An daba wa Jekadan Amurka wuka a Korea ta Kudu

Wani dan kishin kasa a kasar Korea ta Kudu ya daba wa Jakadan Amurka Mark Lippert wuka a fuska tare da yanka ma sa hannu a wani hari na nuna adawa da atisayen da sojin Amurka ke yi tare da sojojijn Koriya.

Jekadan Amurka da wani Mutumin Korea ta kudu ya yanka fuskarsa da wuka. REUTERS

Shaidun gani da ido sun ce mutumin ya boye wukarsa a hannun sa inda ya kutsa kai Cibiyar al’adun birnin Seoul, inda Jekadan ya ke tare da yanke shi a fuska da hannu, kafin jami’an tsaro su cafke shi.

Jekadan ya samu sauki bayan an garzaya da shi zuwa asibiti.

‘Yan Sandan sun bayyana mutumin a matsayin Kim Ki Jong mai shekaru 55 wanda ya taba jifar Jakadan Japan da dutse a shekarar 2010.