Yunkurin tsige gwamna Al-makura ya dauki sabon salo

Yunkunrin da ‘yan Majalisar Dokokin jihar Nasarawa da ke tarayyar Najeriya ke yi na tsige gwamnan jihar Umaru Tanko Al-makura, ya dauki wani sabon salo, bayan da ‘yan majalisar suka yi fatali da kwamitin binciken da babban alkalin alkalan jihar ya kafa.

Gwamna Al-makura na rantsuwa

Bayan wani zaman da suka yi wajen Lafiya babban birnin jihar, ‘yan majalisar wadanda mafi yawansu ‘yan jam’iyyar PDP ne, sun nemi a sauya mambobin kwamitin, bisa zargin cewa wadanda aka nada ba za su yi adalci ba saboda kasancewarsu magoya bayan Al-makura.

To sai dai jam’iyyar APC, a wata sanarwar mayar da martani da ta fitar a wannan alhamis, ta yi watsi da wannan zargi, inda ta bayyana shi da cewa ba ya da tushe balle makama.