An sake samun mutuwar mutane biyu a Masar bayan Mutuwar 74

Mutanen biyu sun mutu ne bayan da ‘yan sanda suka harba harsashe domin tarwatsa gangamin mutane a birnin Suez.

Haka zalika, a Birnin Alkahira daruruwan masu zanga-zanga ne ci gaba da yin gangami a saman titi bayan arangama da ‘yan Sanda.

A birnin Port Said ne za’a yi janai’zar wadanda suka mutu sanadiyar rikicin kwallon kafa a ranar Laraba.

An samu mutuwar rayukan ne sanadiyar rikici tsakanin magoya bayan manyan kungiyoyin kwallon kafar kasar Al Ahly da Al Masry a birnin Port Said.

Sakatare Janar na Majalisar Dinkin Duniya Ban ki-moon ya bukaci mahukuntan Masar Daukar matakai game da rikicin da ya yi sanadiyar mutuwar mutane 74 a fiilin wasan kwallon kafa.

Kakakin Ban Ki-moon yace sakataren Majalisar ya kadu matuka, bayan samun rikicin tsakanin magoya bayan kungiyar al Masri da Al Ahly a birnin Port Said, rikicin da ya jikkata darurua da dama.

Hukumar FIFA da ke kula da kwallon kafa a duniya, ta bukaci mahukuntan Masar gabatar mata da cikakken Rehoton rikicin wanda ya yi sanadiyar mutuwar mutane 74

A cewar FIFA ko wace gasa akwai sharuddan da aka shata, amma hukumar ta bukaci cikakken bayani domin diba faruwar al’amarin.

Tuni dai Sepp Blatter ya danganta wannan hasarar rayukan a matsayin ranar bakin ciki ga kwallon kafa.

Yanzu haka kuma a kasar Masar an fara zaman Makoki na kwanaki uku

Haka kuma hukumar CAF dake kula da kwallon kafa a Afrika, tace a wasannin cin kofin Afrika da ake ci gaba da gudanarwa a kasashen Gabon da E/Guinea, kafin fara wasannin a karshen makon nan, za’a kebe minti daya domin juyayin wadanda suka mutu da jikkata a rikicin na Masar.

Shugaban hukumar ne Isa Hayatu ya bada wannan sanarwar.

A yau Juma’a ne kuma hukumar kwallon kafar yankin kasashen Asia ta mika sakon ta’aziyarta ga mamatan da suka mutu a masar.

Tuni dai Fira ministan kasar Masar Kamal al-Ganzuri ya sanar da sallamar shugabannin kwallon kafar kasar sanadiyar tashin hankali, tuni kuma Gwamnan Port Said ya ajiye aikinsa bayan samun wannan rikicin.